""आसा""
------------------------
हनै फुंबिलि समनि सानजौरां सानबाइदि,
आंनिबो जिउ जोनोम थांखिआव,
जेब्लाबो सोरां रैरुब महरै,
जीउ दिङा दावबाइगोन सान्ना,
लाबाय आं जेबो आसाथिना।
सानजौफुनि दुंहाव सान बाइदि सोरां,
दावबायो आंबो जिउ दिङाखौ सांग्रां,
संसार बाला गुदुङाव आगान होना,
जेब्लाबो गोदान मिजिं थांखिना,
नाथाय सि-मि(परमात्मा) बाहागोखौ सान्नो रोङैआव,
सानसेबो गसाइखौ फुजि रोङैआव,
फैमालसो जाबाय आंनि जिउआव,
फैदोंमोन आं मानि थाखै सि-मि महरै,
मावासै आं सानसेबो सयथि थारै,
गसाइनि बोसोन बाइदि सिरिबांङै।
नाथाय हनै बेलासेनि सम जाबाय,
सानाबो गुरै गाब लाबाय,
सोनाब फैसालिआव साना,
निजोमै गोमा लांबाय।
बिदिनो आंनि जिउ जोनोम साक्षिआ,
संसार लैथोनि रुगुं मोना मोनसेआव,
गब’बाय हनै गुबै बैथायारिनि आंखालाव।
गमायैनो जिउआ बे जोनोमसेआव;
हनै बारग’ लांनोसै आन्दाइना,
आरोदि मानसि जोनोम मोनगोन,
आसा बिनि गारबाय गोजानाव।
+ + + + + + + +
|
"बोसोन"
------------------------
नै सुबुं माखौ लाना देदगादों नों
हानि सोलेरखौ लाना,
थास’ बिलाइनि दै बाइदि जोंनि जिउआ
दानो दं दानो गैया जिउ बाथिआ।
बिमा माहारिनि दुंबुर देहायाव
थानानै बे उदै सिङाव,
जेब्लाबो सिबिदोंमोन आफा अबंनि
आफा गुदिआव।
बारग’सार होदो दे आफा बोराइ बाथौ
समाइना बे मुलुग संसाराव,
सैथि सैथि थाम सैथि खिरा फोरबाइ
आं दिनै नोंनि सेराव।
फुजिगोन आं सिबिगोन मुलुगाव थानानै
नोंनि नेरसोन थिना फारि,
गोसारथों नोनि महिमा अराइथा
बाथौ मुंनि बिदां लारि।
नोंनि अन्नाइआव आं जोनोम मोनबाय
समाइना मुलुग नुबाय,
मायानि संसाराव उजि फैनानै माथो
आंहा हाइनासो नांबाय।
जों गासै सुबुं जिबि मायानि गलामखा
आन्दाइना फार मोना
जिउआ गोरान दंफां थरसेसो
बुखार जायो उदिस मोना।
गुवार लैथोनि दै दाहारा जेरै
लैथोआवनो बिलिन जायो,
बिदिनो जोंनि जिउ दिङायारि बैथाया जावै जावै
संसार लैथोआवनो बिलिन जायो।
बारग’ हाया जेब्लाबो माया लैथोखौ
थारै ओंग्रि नाङो,
जेब्लासिम थर फैआ अब्लासिम थारै
जोनोम सोखोराव गिदिं नाङो।
समायना फावथुन सालिआव दान्दिसेनि फाव लाना
साया माया भावथिनायाव,
गेलेदोंसै नोंबो आंबो दिन्दां फान्दां फावै
हायनारि माया थिलिआव।
नाथाइ माथो उदिस मोना दं गुबै बैथायारि
संसार लैथो बार गिरि,
गिबि लामा दिन्थिगिरि बार होयो थारैनो
हाखर हाला गाहाइ गोजौ गिरि।
बेनो जाबाइ बाथौ मुं थाथौनि गुमुर बिथा
जिउदिङा बारगिरि बैथा,
फरायब्ला खोनासंब्ला गमा मायैनो खारो
थानो हाखाया जेबो मैला।
बाथौनि मुङानो रैखाथि होयो जेराव
बेखौनो मानोथो फोथाया सुबुङा,
मुङानो तब, जब, जाग-जग्य होनदों गिरिआ
मानोथो गनाया आनला सुबुङा।
मुंनि महिमाखौ गुरुआसो मिथिगौ होनदों
बेखाइनो सत् गुरु नांगौ होनदों,
सत् गुरुनि खुगायाव सैथोनि बोसोन
बै बोसोनजों जिउ उदां मोनो होनदों।
सैथोनि दिरुङा जोबोत गोरा बुंदों
गुरु गसाइ सासेआनो होनदों,
बेखाइनो ज्ञानिआ गोसो गराइखौ खाना
जिउखौ माबार उद्राइनो थिनदों।
हनै काल जिबौ गुफुर गोसोम महरै
सान राजा मन’नोसै,
आफानो होनाइ बोसोन खिरा
ओरोइनो फेलें जानोसै।
+ + + + + |
